Contatti

venerdì 15 marzo 2024

Cchiù Cchiù

   S'ogne bbota te sciegli mu me chiami

I juorni chi 'un ce sugnu,

Sempre de cchiù m'addugnu

Miché ca cchiù nu' mm'ami.

           Iu no. Quntu cchiù amare su' re pene

Tantu cchiù, Ddo' Mmiché, ti vuogliu bene.


!5 marzo 1933

suttamanu

 

............................................

Chillu chi  nun po' ffare

'U dirittu romanu,

'U fa caru avvucatu
Nu buonu suttamanu.

........................................

suttamanu: mancia

giovedì 14 marzo 2024

Sempre a mmuollu

 Ah, cchi munnu sciliratu!

e  cchi bbita 'nciuotisciuta!

Mmenu  male ca 'nne datu

 De nne fare  'na futtuta!

  Zerti juorni, mi  nne fazzu

Cchiù ca puozzu... Nove, dece...

E ssi forra tuttu cazzu

 Sterra sempre intra 'nu cece!

venerdì 1 marzo 2024

Amure Giuvine e ccinquantinu

  A bbint'anni vastàvadi 'nu jure

Ppe fare ccu 'nna fimmina a r'amure;

A ccinquanta cce vodi 'na catasta

 De biglietti de banca e mmancu vasta!


9 gennaio 1928

domenica 25 febbraio 2024

' A maruzza

  'Na  maruzza sagliuta chianu chianu

Supra n'arcu rumanu,

guardau ra strada fatta

E ddisse  a ra licerta de 'na tana:

- Supra sta terra nostra taliana

'Un  c'è chine m'appatta;

Si n'autru  pocu 'nchianu,

Nne vidi vattimanu

 E nne vidi alalà.

 - Se capisce! Se sa!-

Le disse ra licerta.

- Si' ttantu granne tantu lesta e sperta

Chi 'ss'unure te tocca bbiramente;

Ma cchiù pprinciparmente

Ppe' ra vava lucente

 chi lassi

 Dduve passi!


30 settembre 1935

giovedì 15 febbraio 2024

Chiàmate 'u cane

 - Cumpari 'Ntò, chiamative 'ssu cane

Si nno le sparu 'mprunte 'na pallata!

- Pristi ccà. Pristi ccà. grann'ammazzata

Si vue ristare ccu re gamme sane.

Tutti mali

 Pecchì, mmo tutti quanti

'Ssi munni sunu chini

 De latri e de briganti

 De puorci e dd'assassini?


- Ppecchì? Ppecchì s'è bberu ca nascimu

I mienzi bbuoni e ll'autri mienzi mali,

Mentre i mali ristamu tali e quali

 i bbuoni cchiù briganti nne facimu.



17 ottobre 1939

martedì 13 febbraio 2024

Zampugne scasciate

 Al Comm. Michele Galatà


Cch'è ssucciessu? Te mannu ogne ssimana

Mo   'na littira e mmo' na  cartulina,

E ttu, fattu cchiù ssurdu 'e 'na campana, 

Te bbuzzari de Peppe e de Rusina!


Mo ccu  ddui vierzi e mo ccu 'nna quartina,

'A musa mia fin'a ssu Ruma 'nchiana;

Ma tu, pecchì è  bbistuta de pacchiana, 

'A tratti cumu l'urtima mappina!


 Capisciu: 'na zampugna paisana

Ppecchì nnud'ha ru suonu 'e l'ocarina,

Ha d'essere mintuta 'n quarantana.


 Ma nu' me pare giustu, pardiana,

Mu mentre 'u core miu ti s'abbicina,

'U tue de  'ssa manèra s'alluntana.


   21 settembre 1939



giovedì 1 febbraio 2024

Gola e spada

 Dissedi 'nu cantante a 'nu manciune

- Nnammazzadi de cchiù

 'Nu cannaruozzu ca nu sciabulune.

- Sicuru, nn'hai ragiune.

 E 'mpatti quannu canti

Ammazzi ttutti  quanti !-


22 ottobre 1926

sabato 27 gennaio 2024

' A sanguetta e ru malatu

  A ra sanguetta disse 'nnu malatu:

- Te vuogliu tantu bene

 Chi 'u sangu de 'ste vene

 Te dugnu  rigalatu.

 È bberu. Si' 'nn'amicu affizziunatu-

Rispunniu ra sanguetta 'e 'nu pantanu,

- Ma iu vulera cchiù ssangu de sanu

 ca sangu  de malatu!


 17 ottobre 1939